ਸਰੀ ਆਰ.ਸੀ.ਐਮ.ਪੀ. ਵਾਲਿਆਂ ਦਾ ਜੁੱਲੀ-ਬਿਸਤਰਾ ਨਵੰਬਰ ਵਿਚ ਚੁੱਕਣਾ ਤੈਅ
ਸਰੀ ਆਰ.ਸੀ.ਐਮ.ਪੀ. ਵਾਲੇ ਆਪਣਾ ਜੁੱਲੀ-ਬਿਸਤਰਾ ਨਵੰਬਰ ਵਿਚ ਚੁੱਕ ਲੈਣਗੇ ਅਤੇ ਸ਼ਹਿਰ ਦੀ ਕਮਾਨ ਸਰੀ ਪੁਲਿਸ ਸਰਵਿਸ ਦੇ ਹੱਥਾਂ ਵਿਚ ਆ ਜਾਵੇਗੀ। ਬੀ.ਸੀ. ਦੇ ਲੋਕ ਸੁਰੱਖਿਆ ਮੰਤਰੀ ਮਾਈਕ ਫਾਰਨਵਰਥ ਨੇ ਮੰਗਲਵਾਰ ਨੂੰ ਦੱਸਿਆ ਕਿ 29 ਨਵੰਬਰ 2024 ਨੂੰ ਰਸਮੀ ਤੌਰ &rsquoਤੇ ਸਰੀ ਪੁਲਿਸ ਸਰਵਿਸ ਦੇ ਅਫਸਰ ਸ਼ਹਿਰ ਵਿਚ ਤੈਨਾਤ ਹੋਣਗੇ। ਉਧਰ ਸੂਬਾ ਸਰਕਾਰ ਦੇ ਇਸ ਐਲਾਨ ਤੋਂ ਸਰੀ ਦੀ ਮੇਅਰ ਬਰੈਂਡਾ ਲੌਕ ਬੇਹੱਦ ਖਫਾ ਨਜ਼ਰ ਆਏ ਅਤੇ ਕਿਹਾ ਕਿ ਪਿਛਲੇ ਤਿੰਨ ਸਾਲ ਤੋਂ ਸਿਰਫ ਲਾਰੇ ਹੀ ਲਾਏ ਜਾ ਰਹੇ ਹਨ। ਮਾਈਕ ਫਾਰਨਵਰਥ ਦਾ ਕਹਿਣਾ ਸੀ ਕਿ ਪੁਲਿਸ ਮਹਿਕਮੇ ਦੀ ਮੁਕੰਮਲ ਤਬਦੀਲੀ ਕਰਨ ਵਿਚ ਦੋ ਜਾਂ ਢਾਈ ਸਾਲ ਦਾ ਸਮਾਂ ਲੱਗ ਸਕਦਾ ਹੈ ਅਤੇ ਉਦੋਂ ਤੱਕ ਆਰ.ਸੀ.ਐਮ.ਪੀ. ਵਾਲੇ ਹਰ ਸੰਭਵ ਸਹਾਇਤਾ ਮੁਹੱਈਆ ਕਰਵਾਉਂਦੇ ਰਹਿਣਗੇ।
ਸਰੀ ਪੁਲਿਸ ਸਰਵਿਸ ਦੇ ਮੁਖੀ ਨੌਰਮ ਲਿਪਿੰਸਕੀ ਨੇ ਮੰਗਲਵਾਰ ਦੇ ਐਲਾਨ ਨੂੰ ਬੇਹੱਦ ਸ਼ਾਨਦਾਰ ਕਰਾਰ ਦਿਤਾ। ਇਥੇ ਦਸਣਾ ਬਣਦਾ ਹੈ ਕਿ ਦੋ ਹਫਤੇ ਪਹਿਲਾਂ ਗਲੋਬਲ ਨਿਊਜ਼ ਵੱਲੋਂ ਇਕ ਸਰਕਾਰੀ ਦਸਤਾਵੇਜ਼ ਦੇ ਹਵਾਲੇ ਨਾਲ ਕਿਹਾ ਗਿਆ ਸੀ ਕਿ ਸਰੀ ਸ਼ਹਿਰ ਵਿਚ ਜਲਦ ਹੀ ਤਬਦੀਲੀ ਹੋ ਸਕਦੀ ਹੈ ਅਤੇ ਇਸ ਵਾਸਤੇ ਕਾਨੂੰਨ ਵਿਚ ਤਬਦੀਲੀਆਂ ਕਰਨ ਦੀ ਜ਼ਰੂਰਤ ਨਹੀਂ ਹੋਵੇਗੀ। ਇਸੇ ਦੌਰਾਨ ਆਰ.ਸੀ.ਐਮ.ਪੀ. ਦੇ ਡਿਪਟੀ ਕਮਿਸ਼ਨਰ ਡਵੇਨ ਮੈਕਡੌਨਲਡ ਨੇ ਕਿਹਾ ਕਿ ਉਨ੍ਹਾਂ ਦੀ ਟੀਮ ਬ੍ਰਿਟਿਸ਼ ਕੋਲੰਬੀਆ ਸਰਕਾਰ ਨਾਲ ਤਾਲਮੇਲ ਤਹਿਤ ਕੰਮ ਕਰਨ ਲਈ ਵਚਨਬੱਧ ਹੈ। ਸਰੀ ਵਿਚ ਅਮਨ-ਕਾਨੂੰਨ ਕਾਇਮ ਰੱਖਣ ਵਾਸਤੇ ਵਾਸਤੇ ਘੱਟੋ ਘੱਟ 834 ਅਫਸਰਾਂ ਦੀ ਜ਼ਰੂਰਤ ਹੈ ਅਤੇ ਸਰੀ ਪੁਲਿਸ ਸਰਵਿਸ ਵਿਚ ਨਵੀਂ ਭਰਤੀ ਮੁਕੰਮਲ ਹੋਣ ਤੱਕ ਆਰ.ਸੀ.ਐਮ.ਪੀ. ਵਾਲਿਆਂ ਦੀ ਤੈਨਾਤੀ ਜਾਰੀ ਰਹੇਗੀ।